İzahlı iqtisadi terminlər lüğətində Biznes-plan haqqında belə yazılmışdır:
“Biznes-plan – biznes fəaliyyətin həyata keçirilməsini, firmanın fəaliyyətini, firma haqqında məlumatları, onun istehsalı, əmtəəsi, satış bazarı, marketinqi, əməliyyatların təşkili xarakteri və onların səmərəliliyi səviyyəsini əks etdirən planı, proqramıdır; təsərrüfat subyektinin fəaliyyət istiqamətlərini proqnozlaşdıran və gələcəkdə onun inkişafından gözlənilən əsas maliyyə nəticələrini müəyyənləşdirən sənəddir. Həmin sənəddə yaxın illər üçün proqnozlaşdırılan satış həcmləri, istehsal xərcləri, ümumi mənfəət və rentabellik səviyyəsi, kreditlərin qaytarılması müddətləri və s. haqqında məlumatlar göstərilir. Sadə dildə desək, Biznes-plan yeni yaranan və ya mövcud biznesin işgüzar imkanlarını və perspektivlərini özündə cəmləşdirən, eyni zamanda, bu imkanların həyata keçirilməsi yollarını aydın şəkildə əks etdirən bir sənəddir.
Ümumiyyətlə, planlaşdırma hər bir sahibkarlıq fəaliyyətinin norması hesab edilir. Zənnimizcə Biznes-planı yalnız kommersiya layihəsinin deyil, eyni zamanda, gələcək və ya mövcud biznesin idarə edilməsinin təməli hesab etsək, yanılmarıq. Məhz Biznes-planın köməkliyi ilə yaranmış ideyaya bir növ kənardan baxmaq imkanı əldə olunur.

Biznes-plan tərtib olunmasının əsas məqsədi kredit alınması və ya investisiya cəlb edilməsi, müəssisənin strateji və taktiki inkişafının müəyyənləşdirilməsi və s.-dən ibarətdir. Biznes-plan tərtib olunmasının dörd əsas səbəbini ayırırlar:

1. Problem yaranmamışdan öncə, onu kağız üzərində (Biznes-planda) görmək imkanının əldə olunması.
2. Biznes-plansız praktik olaraq sərmayə cəlb olunmasının qeyri-mümkünlüyü.
3. Biznes-planın sahibkarlıq subyekti ilə yaxından tanış olmaq xüsusiyyətinə malik olması və bu sənədin sivil bazarın vacib tələblərindən biri kimi çıxış etməsi.
4. Biznes-planın vacib nəzarət və idarəetmə aləti olması.

Beləliklə, Biznes-plan sahibkarlıq fəaliyyəti sahəsində düşünülmüş ideyanın başlanğıc nöqtəsi və təməli, onun həyata keçirilməsi haqqında vahid strateji məlumat mənbəyidir. Bununla da Biznes-plan yaranmış ideyanın həyata keçirilməsi prosesində bütün əldə olunacaq nəticələrə birbaşa təsir göstərmək qabiliyyətinə malikdir.